BAKTI MUKTI SALAH ARTI BAKTI SALAH BUKTI

BAKTI MUKTI SALAH ARTI 

BAKTI SALAH BUKTI

(Olih: Tubaba Griyang Bang) 

Aken baan Cening 

Manjusin layon Memene..... 

Baan boreh kuning keto mase sisig ambuh apang kedas ebok Memene. Sakewale Ning.....

Dugase Meme enu ngidaang maangkihan, salingkih Cening manjusin, 

pragat di balene Meme maguyang tuara taen Cening maekin.....

Cacep liman Ceninge nanding ane madan saji tarpana, 

ngararis kagenahang ring ulun layon Memene...... 

Sakewale Ning......

dugase enu Meme maurip, 

kadirasa bubuh embon Meme kapah maan ngidih.

Sekancan tirta....

mawit tirta panglukatan ngantos ka tirta pangentas tunasang Cening, 

tatujone tuara ada len......

apang pajalan Meme ngungsi tanah palekadan sida rahayu. 

Sakewale Ning......

Ne malu dugase Meme enu ngidaang magelekan, 

yeh nyem tuara taen Cening ngenjuhin.

Tumpang salu, 

bade managa banda gaenang Cening anggon Meme masare...... 

Sa doh gumi Cening kanti ngalih undagi apang pragat ja yadnyane nenenan,

Kewale Ning...... 

Dugase Meme enu mataanan, 

salingkih bale, tikeh pandan abidang Meme tuara nawang.

Ning........

indik makejang yadnyan Ceninge mratekain layon Memene, 

angayu bagia, 

Meme lega, 

Meme demen. 

Sakewale Ning......

Yan dadi Meme ngidih, 

ento buka reraman Ceninge, 

I Bapa, kurenan Meme, 

enu madan maurip, 

enu nugtugang tuuh, 

runguang ja ragane, 

selegang ngayahin ragane, 

apang tusing disubane pegat angkihan,

ditu mare lantas Cening rungu, 

nirguna pajalane totonan, Ning.......

De buin nirgawe bukti, mukti, ane salah arti..... 

#piteket@ida bhatari hyang sinuhun.nujugenah.sunialoka#