{1a} Awighnam astu nàma siddhýa
Iti pawarah ning wisik, Ida Bhatara Hyang Sinuhun Siwa Putra Parama Daksa Manuaba, wus têlas, rêngê haywa simpang angênta, yan sira siddha ring patin'ta swargga, wruhana ahungguh ing wurip'ta, hana suryya candra trangganà lintang ring awak'ta, ika hawasên dén jati ri luhur ing anggà mwah ring sor ing anggan'ta. Yan ri jaba mwah ring jro ning anggan'ta, iki tatà ning sariran'ta ; yan ring jaba ning awak'ta, don ing sama angrasa, mapan téja ning suryya, mwah téja ning sanghyang
{1b} hulan, téja ning trangganà lintang, ya saking jro ning sàriran'tà, ya suryya hatin'ta, ya wulan amprun'ta, ya trangganà pupusuh ta, ya lintang wutêk'ta, ya hingaran hati putih, kahora dé ñyali putih, ya hingaran sari ning tuñjung, irika paraning turu, sangka tangi, ya ungguh ing bhatàra ning sarira, sari ning budhi ya manah. Sari ning manah. Ya
{2a}taranggana. Ya lintang, panunggalnya maring luhur ring ñyali ning hati putih, yan mêtu ring jaba sarira, wahya ning budi mata, wayaning ñyali, ya pangrêngö, wahyaning bayu, ya sabda, sangkan mêtu ring cangkêm, wayaning angin, ya pangambung, ya sangkan rumawak gandha mêtu ring hirung, panunggaling rasa, ring pangrêngö, saking rasa lêga, panunggalnyà ya maka katiking tuñjung putih, sangka panêlasing rasa, panêlasing
{2b} hurip, panêlasing atmà, patinggaling déwà, saking ñyali putih, ring sari ning tuñjung putih. Ya tuñjung putih sari ning awakta, sangkaning sùryya sasangka, yangkên tapakan huriptà, mwah tapakan atmanta, tranggana, lintang, yangkên payung huripta mwah payung atman tan andungkap lêwih maring téjomaya, swargga nira bhatàra
{3a}anungkurat, ya tabêtakna pawisik ingsun lawan ing sira, dùlurên ring buddhi mahaugya, hayo katåsnan, tujunên sadhyan'ta mayogya. Yan wus kasuk dé nira bwanà agung, parê pamêtu ning sùryya mwang ungguh ing hulan, lintang trangganà, apan tan lén bwanà agung lawan bhwana àlit. Yan sira arsa wruh patinggalaning atma sah saking raga, amåttha pramana, yàta yatna akêna dén rêgêp haywà mingé, sah ira ring kundi sphattika, sah ira sanghyang
{3b} amåtthà pramana saking mawindu komala. Windu komala, nga, sunyà ning antakayala ingiring déning dasa pranawa, ungguh ira ring sàrwwa sandi ning sarira. Yan wus têlas pwa sah saking sarira panujuning sanghyang amåttha pramanà, misrà maring lyanging apadhang, sanghyang atma anuju pwa sira ring pañca paramàrtha.
{4a} Pañca paramàrtha, nga, ungguh ira raditya hulan, lintang tranggana, ring sor pisan, ungguh ing bayu mandala, ring luhur irà pisan acintya sunya nirmala, nora lêwih sakérika, sapanuju nira wênang. Yan sira anuju ungguh sanghyang raditya, ya ta swargga nira sang sura ring tapa. Yan sira mahyun anuju, ungguh ira sanghyang hulan, ya ta swargga nira sang sura ring rasa, yan sira manuju ungguh ing sangghyang lintang, maring téjomanta, yan wus
{4b} karasa pwa dé nira piyak bobokong ira, yan wus tan parasa telampakan sukunta, mwah rasa ning tud irà pasah mwah rasa ning paglangan suku nira ha rasa palas, sasor ring nabi nira marasa mamatu, kakàs saranduning carmma nira, posêk pwa rasa ning hati, kadi angarêpakên agni sêdhêng pralaya, ya ta marang mukha ngaranya, sira dén rêgêp
{5a} kasunyaning manah irà.
Ya apra ngàranya, yan sira pwa mênang sakéng rikà, ya ta swargga nira sang suta subratà, yan sira pwa nuju ring ungguh ing sanghyang trangganà, ya ta swargga nira sang putusing haji mwah sàrwwaji, mangkana panêmu nirà. Yan sira wikana ring pati ng waluya, duk lagi ahurip, yan tan wruha mangkana, anotah pwa pati nira, iti kalêpasan haja wéra liwat piningit dé ra sang dwija, bwat upadrawa.
{5b} Iti kalêpasan, ya têka pwa ring samaya ning pati, haja pêjah ring pangrasa pusuh-pusuh, mangkana pwa kalêpasan, utama dahat, haywa cawuh bwat upadrawa. Yan sira mahyun pwa siddhi ning yogya, apêningan pwa sira sêpiyaknà angênta, mari dénya ngwésa. Ngwésa, nga, angênêngakên pangrêngênta, angênêngakên
{6a} sabdanta, liyêpakên tinghal'ta, haywa kêdap, koñcinên bayunta, simpênakna ri têlênging idhêp, haywa limbak.
Yan wus hêning pwa idhêpta, tan katon saraganta, mwah ungguh ta, tan sasàr pwa têmu nirà, ya manggêh pwa sira, blah pwa rasa ning pañcahitan sirah ira têka ning gidat ira, cunguh ira têka ning dada nirà, trus ni gigir ira, ya mbolong pwa babahan tiga,
{6b} ring udêr-udêran, ring sunya ning rah iku, nga, marggà ning lêwih. Yan wus karasa mangkanà, bidêlên pwa palêt-lêtan ira, tujukna ri pwa sunya ning babahan ring udêr udêrà, ya ika paran sanghyang atma sah saking kamala ràtnà. Malaràtna, nga, hyang pritiwi. Anom ing rupa, jiwa ning rupa, mulih maring sanghyang akàsa, rasanta doning bahunah, mulih maring sanghyang pritiwi, bayunta hunah, mulih maring sangkaning
{7a} angin, upamaning surud ta, lwir ; panglong, duk ing ananta, kadi panànggal. Panànggal, tan urung purnama, panglong tan urung tilêm, mangkanà pwa tingkah ing sarirà, doning déné wruha uga réh ing apasarira kala ning lagi ahurip, didiné, sira wruhas, padatuna, turu tan énak, pajalan tunà, rasa tan kadhi duk ing papangkas, pundi laku
{7b} ning atilar. Rupa duk ing papangkas, iku pwà hawasên dén kawruhanà, waja doning ical saking tutuk, jiwa ning wajà mulih maring dora, soca nira doning tan mawas, jiwa ning sanghyang caksu mulih ring sanghyang manon, laku nira tunà, mulih pwa ring tan hanà, jiwa ning sukunta, dwaning purusta tan makas, jiwa ning purusta mulih ring sang panêmunta. Iki utama dahat, haja cahuh, rahasya dé nira sang putus ing yoggà, dåwya
{8a} nira sang bhujangga siddha humoksah, piningit ring sùkûmàha jñana nirà, tan sipi mulé ne nira sang putus ing sadya. Manih hana sadya nira sang putus ing hyang sinuhun, ring kajatining lêkas ning têngêran, ring susud ning huripta, hana pwa têngêraning jro rasanta, iki lwirnya : dwaning rupa katon aturu, wajà ical, soca tan padas, purusta manakataning ngràt pwak katon dé nira anarawang pwa katon asudha tan patalêtêh, kadi pwa dipta ning mêkà, ya
{8b} cintyàsunya, nga. Ring têlêngnya hana pwa katon kadi hulan pùrnamà mawêlu, apadhang sunya nirmala, ya pramasiwa, nga, ya pwa katon samangkanà, hawas pwa dé nira kanda pitu ning bhuwana, muwah kanda ning swargga, mwah déwa déwinya, ya ta yoga jàti, nga, liwat pwa pamanggih irà, tan kataman pwa sira hila-hila mwah sang kala liwat ing
{9a} swargga, cawuh, bwat upadrawà. Mulé hargganya. Harang sang pandita angwikani, yan tan sang putusing samadhi. Malih yan sira arêp, ayoga wisésa, angandapakên salwiring hila-hila mwah sàrwwa ujwala, salwiring galak, salwiring wisya, ri yuga nirà anêmuhakên tri sakti. Tri sakti, nga, bhàyu sabda idhêp kasimpên maring unggwàning tayà, taya, sanghyang nirakling, Nirakling, nga, amåtthà suddha, irika pwa pamàti ning sàrwa hala, sarwwa
{9b} krodha, sarwwa wisya, sarwwa ujwala, yan pwa usah énak dé nira mayoga, tibakna taya nira saking gênah ing jwala, gênah ing galak, gênah ing wisya, gênah ing hila-hila, sangkaning jwala, sangkaning hila-hila, sangkaning krodha, sangkaning wisya, simpên ring gênah ing taya. Sangkaning taya, nga, ring swasuci ning hatinta, ya ungguh ing taya, ya lêbur dé nira.
{10a} Apan guru ning hila-hila, guru ning jwala hiya, guru ning balabar hiya, guru ning krodha hiya, guru ning wisya hiya, ya sakaning angwisésa. Iti yoga wisésa, nga. panglutserakên sàrwwa jwala, sarwwa krodha, sarwwa wisya, sarwwa balabar, sarwwa hila-hila, sarwwa ahéng, liwat utama, rahasya têmên. Dé nira sang nipuna labda, apan larangàn ira, sang bhujangga bhrahmanà, putusing yoga, arang sang pandita
{10b} ngwikani, agöng hàrgganya yan tan adulur bhakti. Yan sira wruh sangkaning patin!ta, saking jro pupusuh, sangkan'ta atinggal, sanghyang jiwa pramanàn'ta, doning sah pwa saking rikà, sah ing raganta pwa hus asat, cah, nga. Gêtih, pwa saranduning awak dadi bhayu prahara, pangisêpnya maring mulakàn'ta, sangkan tan katon patilar ing gêtih, apan dadi kukus mayà misra ring
{11a} norà. Garaning wong mati agring, tan hanà agêtih, doning harang angawruhi, yan sira pwa wus angrasa ring patilar ing hurip, cidra pwa laku nira larad mwah sangkaning laradnya, patinggalnya saking hulu puhun, ikang jiwa pramana, ya ta miduhur paranya, têka pwa ring nabhistanà, ri kapa ujwala tiksna ning sanghyang suryya angêbêki salwàning anggan'ta, dahat tiksnanya.
{11b} Yan wus samangkana karasa dé nira, panggêngên pwa sarasa ning laranta, haja pwa mêngakna babahan sanghyang muni, yan wus langgêng pwa dé nirà, amêkêk sarasa ning larà, sakéh ing papa naraka ning awak'ta sapurna pwa dé nira amênêngi, winalêsan pwa déning tis sanghyang amåtta kundalini mêtu saking kunda manik, nga, kuciting gulunta, ya aniram satiksna ning sanghyang suryya, yan wus samangkana pulung
{12a} pwa hurip'ta lawan atmanta, mêsat anuju babahan ira apadhang, saking kocakapalà. Kocakapalà, nga, udêraning sirah, anungkap pwa sira swargga nira sang wus pêgat ing rat, tan pawali añjanma malih. Iti palaning yoga jàti. Tananà malih lêwih sakériki, rahasya dahat, mulé déning bhujanggà nguni, bwat upadrawà, haywa wéra, yandyan hala pati nira, tan urung swarggà, lamun kala ning ahurip sira wruh, mulà
{12b} sangkaning patin'ta, doh yan sira amanggiha naraka. Iki Pawarah ning Pawisik Ida Bhatara Hyang Sinuhun Siwa Putra Parama Daksa Manuaba, pascat tinular dé sang anama I Gede Sugata Yadnya Manuaba, S.S., M.Pd, Jalan Tangsub No 4 Griya Agung Bangkasa, Banjar Pengembungan Desa Bongkasa Kecamatan Abiansemal Badung. Ring rahina Budha Cemeng Kelawu. Tilem Kepitu, tanggal 13 Januari 2021, Sasih Kapitu, Ngunya Keenem, Rah 10, Windu Sanggara, Tenggek 3.
Tidak ada komentar:
Posting Komentar