Ong awighnam astu nama siddhi.
Kelaṡa ning nāma siddhi, dharma smerti ya jagat iti,
sarwa dewo prěsimetak, iṡwara pada kañcani.
Ikang Ida Sinuhun Siwa Putra Parama Daksa Manuaba sira maněmbaḥ mamūjā ri Ida Bhaṭāra Kawitan kalawan Ida Bhatara Mpu Gana, ring pucak ning Pundukdawa, malinggiḥ ring padma kanaka lawan meru, sarwa dewa rowang nira, makâdi namika ring hayu ning kang rāt, adidewa ewaca, ujar Bhaṭāra, ling nira.
Wṛdhawa hana ṡabdopi, wīprane sranwa padana,
daṡaṡca ca kleñca, papa wighne winaṣakala.
Anaku kita Hyang Sinuhun, kěnoh ingka patakonta ri kami, nimitta nirâtma hajöng arěngönta wuwus mami, mahāpawitra, kata wěnang manghilangakna wighna, daṡa mala pāpa trimala, haywa ta kita tan prayatna, dlěngakna tmahanta haywa salah angěn-angěnta pawarah arěngön, marapwan ndi ta wruha mêwěḥ mwang sangṡaya lāwan hala hayu ning rāt, nihan kramanya // o //
Sodarangko mahā kāla, hayu dana maka karma,
dewa yandokrama tadwa, lokaraṇa.
Kalinganya ya mahākāla, pâwak ning mahākāla, yan durbala ning kang rāt, makweḥ prang, lahru winahingyang, kawah ikang rāt donya, matangyan hilangakna de sang amawa rāt // o //
Rāja purohita samyak, sangamaām ṡuddha ṡila,
trasadyoka pujarastwa, dino ratro muniṡwara.
Akaṡa wanmapadyane, prabho dirgha yamatrake,
mananatrakna tawyato, ṡriya wisoka matonya.
Kalinganya yogya purohita ikā, sang wiku wruh ing tattwâgama, wruḥ mangaji trayi, satya ring istrī, ring mās pirak, tan mithyā ring wacana, agělěm amūjā rahina wěngi mwang latri sadākāla tan kaluban, ring ṡiwa arcaṇam, mṛārthanakěn ring hala hayu ning prabhu, sira ta yogya purohita, maka manggalyan ikang rāt, sira sawuwus nira pinintuhu, katwangana pamūjā ning mās pirak de ning sang prabhu lāwan rāt, apan ikang rāt rahayu denya, matangnyan takonana sakâpti nira // o //
Prano karma tadibhakti, pūrwane sūrya sewanām,
Madhya dana bhuta yajña, Madhya ratro ṡiwarcaṇām.
Kalinganya ulaḥ sang prabhu, yan mahyun angajöngan i rāt, pangěban ing bhuwana hujěngana ta wungwa tan kacawuhan, na walu maṡucya ta sira, tumulwi amūjā ring Sanghyang Āditya, těngah ing wwe mamūjā tatawura ring sarwa bhūta, makâdi ring Sanghyang Rāma Rāja, těngaḥ wngi mamūjā ring Sanghyang Ṥiwa // o //
Awipako mascañuda, halěpya manahayato,
ayaso pinidewatya, nahan dana ta rakṡasa.
Kalinganya yan hana mantra alpa pamana-mana ring sang paṇḍita, ampah-ampahing sarwa kārya, apangadang bhawaninya atěngěr detaya ta hilang nāgara sang prabhu // o //
Manām na pūrwa karyamo, praja nupulana kūryat,
na muni na dewa murccha, payoge bhuta sutawan.
Kalinganya tingkaḥ ning sang mantra sang ginlar senapati, tan ampag-ampag, wiwekaněn rumuhun hala hayu ning kārya, wruha ring satopaya (sakôpāya?), wruha ring sarwa karma, saduha ring sarwa mala, ṡabda kamahata, tuhu-tuhu bhakti ring Tuhan // o //
Wiwekimba pikūryate,
harananiyatin rasta,
hakangoto mata prabhu.
Kalinganya wuwus mangkana, mangkana tang don sang prabhu dulurani wiweka, niyata jaya ṡatru sang prabhu nora nirwighna // o //
Kukule muni rityatu, mastra japi wicakṣaṇa,
samnaka jiwato nawa, utpatah rāja dūrbala.
Kalinganya wih anaku listuhayu, lakṣaṇa wruh ing angaji wruh i ṡiwâgama tuhu teja janma, cewanggana lwirnya, pañjar, canadana, pangkon, angamběng, padang pasir, ṡabhā ukir, cedani wiku. Pañjar, nga, wiku wus ning yan janma, kadang aji kunang. Candananya, nga, wiku matunggu aji, canaprāsāda, susuk simpuru, brāhmaṇa ṡewa sogata, mangkana, nga. Wiku tūs ning kabayan buyut, pasimanan siman, angamběng, nga, wiku tumūt alayar, kāryan dinaṇḍa dagang, patitihan, malapasir, nga, wiku mamañcing ceda pangupadeṡa ning amalaku mās pirak, guruyaga, ṡabha wiku, nga.
Wiku magawe taya pitra ning māti, mangūrwa mās pirak, guruyaga, phala bhoya (bhoga?), mwaḥ milu kāryani suratan, ya tika wiku cedangga ngaranya. Mawe sira tīrtha ring sang prabhu mwang rahup, utsāha těměn ikā, mangunyakěn hila-hila ning sarāt tan swasta sang prabhu denya // o //
Muni sukulastranta, ṡuddha ṡila sulakṣaṇām,
ginanadi yatsonata, sulabha pūrṇa lakṣaṇām.
Kalinganya sang paṇḍita sukula, pawitra janma, ṡuddha ṡila wruḥ mangaji, matrayi, angratmajapa pūrṇa lakṣaṇa, sira asunga tīrtha rawup ring sang prabhu, mangka lpanya kunang, sira matangyan ikang rāt rahaywa, paripūrṇa swasta dīrghâyuṣa sang prabhu, sulabha lakṣaṇa tměn ikā.
Kalanace len asih, kratañcaḥ tīrtho dwapare,
angkara lila patyantu, rakṣan anacaḥ wilokasya // o //
Nihan prakāra ning krama pāt kweḥ ning yoga. Lwirnya, kṛta, treta, dwāpara, kali sanghāra. Kajarakna maka nimitta karākṣa ning rāt.
Prajana rākṣa ning kṛto, yogyṡca satya padinām,
sisudani putěndātyam, municangmaya bhaktinām.
Kalinganya ikang rāt, dudū karākṡa ni sayuga sayuta. Kunang rākṣani rāt ring kṛta pajarakna rumuhun. Nāhan karākṣani rāt ring kṛta. Yuga rahayu maka nimittani yuga, samādhi lāwan kasuṡilan, kaparamârthan, kasādhu ning sang prabhu // o //
Lokaning rakṣajikuyat, titale patinidena,
sandimat dharma lepani, janadiroma karaṇa.
Bhuwanosya wanda name, dwapare sasane kāla,
sarwa yajña samantaranām, prabhū na mūji na kuyat.
Kalinganya ikang sang prabhu, sang paṇḍita de ning amahayu rāt, ring dwāpara yuga, mahajönga maka nimitta sarwa yajña, huma yajña, dewa yajña, pitra yajña bhūta yajña, paṇḍita yajña, mānuṣa yajña, saha mantra ṡakti // o //
Parajñoning pati kalitrām, loka mukena rakṣanām,
haněka dharma kappena, wadwo rāja sahataman.
Kalinganya karākṣa rāt mêwěḥ sādhu sakweh ing agawe hala, tamaḥ satara, pinangan mwang kâbhimānan. Kunang hetu ning kaliyuga mangajönga // o //
Narêndra bhiṣekamawi, munisěna mahā kāla,
mantra kamani sěkana, samya lokasya wadwākěn.
Kalinganya bhiṣekaněn lāwan mantra nira de sang paṇḍita wiṡeṣa. Sang Prabhu wehnang aji Sanghyang Êkacakra tīrtha. Sang Mantri wehnang aji bhuwana purāṇa // o //
Pañca duṣṭana ṡilañcaḥ, muke deṡa mapagamām,
tajetnaṣa guṇalokām, bhaye nagětyadanat.
Kalinganya ring wěkasan mara yan dāna n de sang nātha gumawayakěn jagatraya, matangyan mari mūrka, pāpa měněngnya matakut sira sarwa duṣṭa, maka nimitta guṇa ni sang prabhu, matěguḥ sira ring kaṡaktyan mulahakěn dharma prakṛtin ikang rāt // o //
Sarwa guṇajire naṣa, mantrad otsaha buddhinat,
krětana lepana wadwa, kayoki yatikasada.
Ring sěḍěngnya měnděk sang nātha, guṇa ning sang prabhu, sang mantra utsāha malasakěn ikang nīti, mapa ta nggwan ing prayatna ri ṡila hayu, matmahan kṛta yuga, ikang kali sanghāra yuga // o //
Dīrghâyuṣa na sawatadhah, niroga nirupa bhrawa,
ahasya sampadañcewaḥ, hanankaboraditaḥ.
Kunang wastu ning kaliyuga, ikang rāt tan agring upadrawa, dīrghâyuṣa ikang wwang akweḥ pinangan, pari nitya dadi // o //
Dana ratna suwarṇām, prakirnañca sabrěta,
lokekana dirghawaca, malo paṇḍita ṡuddhanaḥ.
Nāhan ikā cihna mwaḥ kang mās pirak, wartakahmanya denya, maka nimitta de ni kweḥ ni hudan, de ning pūjāni sang paṇḍita // o //
Wrěkṣo pipala sakinah, praṇampya pradisanta,
sūrya tejo nandahingkanām pakṣi mṛgo mahasukām.
Kalinganya ikang kayu-kayu sarwa nitya phala mawoḥ, tan knêng laws, ikang nanda kweḥ wkanya, teja Sanghyang Āditya tan apanas dahat, de ni megha nitya sumangsang ring ākāṡa // o //
Sarwa gamanta duksadwām, paja suklo karakṣanat,
brāhma wdak tranedade, ṡaraṇatwan acatur warṇa.
Ênak ta wijilan ing sarwa gama, maka nimitta rākṣa ni rāt, maka kāraṇa dewa mantra gěgönya de sang catur warṇa mwang catur jadma. Nihan lwir nya catur jadma, brāhmaṇa, kṣatriya, waiṡyā, ṡudra, dwija, pusi (Ṛṣi?) ṡewa sogata, brāhmaṇa ikā.
Prakadan catur ajanmanām,
brāhma gětya danaraṇa.
satriya, nga, prabhu rāja putra, kadang aji, kṣinatriya ikā, Waiṡyā, nga, tūs ning kabayan buyut, wwang tani, kulinya ring deṡanya, yêkā waiṡyā, nga. Ṥudra, nga, adagang, ampuhawang, apatitihan, amangka, nga, yêkā ṡudra, nga. ikā pāt mijil saking ṡarīra n Bhaṭāra Brahmā // o //
Ga brāhamaṇa paṇḍani,
tundani calaṡcewaḥ,
dṛṣyane bhuwana toha.
Kalinganya tiga tikang puruṣa, tan mijil sakêng ṡarīra Bhaṭāra Brahmā, lwirnya, pañcaka mahasta daṡa canala (cāṇḍāla?), mleccha, sadtwa // o //
Kṛta gadga mala gañca, citra karo murawañcaḥ,
nguṣadhani kamām, dharma yuddha canduraněḥ.
Kalinganya ikang Pañca Karma tan tūt ing catur janma tan tumūt cāṇḍāla. Kunang tinūtnya dharma yuddha. Kṛta kadga, nga, paṇḍe wěsi. Pala gañca, nga, paṇḍe ḍaḍap. Citrakāra, nga, anglukis, murawañcaḥ, nga, juraheng, uṣadhā, nga, surâtman, yêkā panca Karma, nga. // o //
Aneka candela wuktah, wṛkṣabih gata karaṇa,
tāstra malaning atañcaḥ, prakodayan pranantaḥ.
Bandaro ratna candañcaḥ, trimidaho jala graham,
sarwa datuni dandañca, toya kañcana sanggrahā.
Raktatuta krasranām caḥ, tělakriyakuñca karya,
dyatahetawa jatana, drawyasi brāhmāsta daṡa.
Kalinganya waluwlas kweḥnya cāṇḍāla krama, lwirnya, uṇḍagi, amalantěn, agungge, ajagal, abrakis, acwamani, akaris, apaṇḍe mās, manglimbang, ihanggabag, amědil, ikā ta kabeḥ, aṣṭa daṡa cāṇḍā karma, ngaranya // o //
Padha mleyo mṛta domlědo, kita danūya padina,
dharmana siddhā sidyasaḥ, sad sakya suta sanggrahā.
Něm kweh ning mleccha, lwirnya, agending, angawayang, amrak igěl, makidung, amula-mula, anika // o //
Tudany sadwiya yanaṡcaḥ, yanado duṣṭa sawana,
kiñcanakaḥ kling masangkya, sawaḥ monita daranaḥ.
Něm kweḥ ning cuta jadma, lwirnya, amandang, kuming, amurěng, angalor, tan dawūk // o //
Catur warṇanām, bedayanaṡca daṡajña,
brāhmaṇa baya maha mṛṣṭo, satriya deṡa sṛdaṡcaḥ.
Kalinganya tingkah ing catur jadma, lwirnya, brāhamaṇa, kṣatriya, waiṡyā, ṡudra. Bheda krama nira sowang-sowang, maka nimitta dudū katonya, saking ṡarīra Bhaṭāra Brahmā, dudū ngaran ira dūk sěḍěng niwasāna // o //
Jataweda karakṣya, brāhmaṇaṣya mahajanām,
kṣatriya mahopadyām, brāhmaṇa dewakaneṣya.
Sang brāhamaṇa mijil saking muka Bhaṭāra Brahmā. Kṣatriya mijil saking bāhu Bhaṭāra Brahmā // o //
Weṡya samani mitrahuḥ, huroanggawa hanangṣya,
pradapate ṡudrasya, hamapinta dyatmanya.
Ikang waiṡyā mijil saking pupu Bhaṭāra Brahmā. Ṥudra mijil saking Bhaṭāra Brahmā // o //
Brāhma ṡāstra sataṡcaḥ, kṣatriya lokakanām,
weṡya kṛti walas sewaḥ, ṡudra pitusadewara.
Kalinganya dharma ning sang brāhmaṇa, wruḥ ring ṡāstra sarwâgama, aglěm amūjā satlas ing sarwa trayi. Mangrākṣi tang rāt, mapagěḥ ring kaprabhun, wruḥ ring rasa ning bhuwana purāṇa, dharmâji ring waiṡyā, magaga sawaḥ, mangun ing kanali dawuhan, sumuluhana tamwi kaniṣṭa madhya mauttama, atěguha ring mānuṣa sāsana, dharma ning ṡudra angarěpakěn sarwa kārya rāt mayuhakna pasar, mangěyakna kitriyasa puṇya. Mwaḥ malěpasana dana pirak, sewaka ring sang prabhu, bhakti ring sang paṇḍita, pagěha ring katuladanya, matěngěta ring waraḥ sang paṇḍita // o //
Niṣṭa makṣayoyaḥ, musiko makarasonaḥ,
krimiho manakaṡcewah, na bhuktiye narêdra ya.
Nihan kaniṣṭa mānuṣa tan wěnang taḍahěn de sang prabhu, lwirnya, tikus, kadal, ula, ulěr, wiyung // o //
Niṣṭa mangsa tabakṣanataḥ, maloka ṡatru wamena,
hinakayām dutaṡcaḥ, agoyusrām bhumi kṛmpa.
Nihan tingkah ing sang prabhu, kāla yan ajěněk aniṣṭa mangsa, makweḥ doṣa ni rāt, sang wruḥ mangawa manaḥ hina ṡakti, ilěk, prang makweḥ, usik nikang rāt // o //
Kām subhakti mahamangsām, mitawaraho mragaṡca,
matipipakpi brāhmari, wrasabo prabhu nasuwi.
Nihan sinangguḥ mangsa rahayu, kataḍaḥ de sang prabhu, lwirnya, iwak tasik, bawi burwan, mesi, wahingsa, tawon, itik, ayam, antiga // o //
Triyayo sinarning prano, dyanisawe mahabakṣo,
dewa pudyakta rasamyak, pramaṡūnya lakṣaṇām.
Tingkaḥ sang prabhu yan pataḍaha, sôpacāra pangudětan, malinggiha ring pataraṇa, pahênakěn de nira běněngěn hiḍěp ira, mwang buddhi nira, rěgěpěn i karma ni kaprabhon, mamūjā ta sira rumuhun, maswara ring dewa mwang ring sarwa bhūta, nyata manggiḥ suka sira, wīrya magöng // o //
Kanta rājaswala iti, sanggama sparmasañca,
ndrěpaṇa wikaraṇat.
Ri sěḍěng istrī brahmahatya prawaning kunang, tan wěnang sira sanggamaha. Ila-ila těměn ikā, bwat magawe wighna // o //
Twām karma sanggamām rāja, budya nirmala ya bhogyām,
nirarya subhakṣanām, pawitra karma pujām tām.
Kunang sang prabhu yan hayun prasanggamaha lāwan binihaji sakala weḥ hayu ring hěning buddhi nira kaliḥ, pawitra těměn ikā, sākṣāt mamūjā ring Sanghyang smara ikā, yan mangkana // o //
Sanggrahā prabhodanasya, akisjinda loka durbala,
makinaka wadaṡcawaḥ, agniki wimala wadět.
Sang prabhu lah anggaměla pirak, durbala ikang rāt, makweḥ pañcawala, akweḥ mala ni rāt // o //
Bhumite rapitatṛṣṭa, cakṣyuḥ sadanam ewasya,
ṡāstra waktaḥ prabhu lakṣaṇām.
Ulaḥ ira sang prabhu, tuminghala juga sira, hulun ira kakaprasadaya de ning anggaměli pirak, mangkana tang lakṣaṇa yukti // o //
Prabho mrago pakṣi asta, mukěna astakami,
loka wyangisti rogana, yuddhe sanema kenena.
Sěḍěng mahima mrěga pakṣi sang prabhu, paka ṡaraṇa ng tang anda ning mūrka nira, denya tang manggiḥ hala ni rāt // o //
Wyakti majakěn i mās pirak, těkana sakâpti nira, marapraṇan sang prabhu manmak êkacatra. Nihan guṇa ni sang paṇḍita, widhi akārya mahābhāra, tan hana lěngka rāt de nira, tan kawnang sira de ning saptopada. Matangyan sira sang widhi, pati sira tangisana, sěkungěn sira de sang prabhu, ndan mêwěḥ rāt marohara, upadrawa de ning hyang ri makweḥ sang paṇḍita, widhi patita nghing samana nambanana satan sang prabhu. Haywa lamba sewaka dharma ring sang paṇḍita karuhun balantra nira. Māsa ning tang rāt kabeḥ, paḍa prajñanya wruḥ ring sapta upāya, catur parikṣa, ngasamakanan ḍanganya, tan wruḥ ring kamahābhāran tuhun sang tětěs. Wruh ing tattwa ning bhuwana hala hayunya, sira sang paṇḍita widhi pati juga makweḥ prang, marohara tang bhuwana // o //
Hamacaro mahapati, trusbrata hayu lakṣanām,
lokena tunayanapi, pralatmanaḥ kewalaḥ.
Yan tan pacaraha sang nātha mahala-hala āmběk ring wwang kabeḥ, sama hala ring āmběk marohara tang bhuwana // o //
Bhupati pralaya samya, sarwa caro rakṣa dagdha,
hanocara wipracawi, niyata bhumi nimalaḥ.
Prayatnaha sang prabhu, prayatna ikā rāt, mapan anūt tingkaḥ sang prabhu, manutur ing āmběk yukti, apagěḥ ring dharmanya sowang-sowang, ênak tingkah ing rāt kanāna katalutuḥ ring bhuwana // o //
Bape bhakti maha paṇḍita, suwarṇa dakadiyakti,
buktwanaya wilipato, sarwa karyahām sambhawām.
Tumūt ulaḥ sang hyang sinuhun siwa putra parama daksa manuaba lāwan mantra nira, bhakti sira ring kawitan sang paṇḍita, widhi pata purih ing upadeṡa ṡāstraha ngaranya, sakumaya alah i kita, udāsīna ngaranya, aji guṇanya irikā tan wruh ing sarwa guṇa, mangigěl aṡramaha maněmbaha, kandaga, curiga, itiwa mandi, ṡucya ta sira, ṡūra ring raṇa, satya wacana, bhaktya ring sang prabhu, guṇa graham, dharma buddhi, hana pangawruḥ sira, irikā sira wadwa ngaran ira, wruh ing nāgarâṡrama, mêngěta sahilaning sang prabhu, hana wwang mūrccha, pratilya. Atwang mūrka ngaranya ring nahasya de sang prabhu tinulaknya, tan ikā tinakonakěn, irikā winarahakěnya, wetasya, ngaran makweḥ sawurnya yan pangura, wruḥ ndātan panglingkara de nira wruḥ. Matangyan sang prabhu sira haywa tan padṛwya wiku widhi pati, matangyan sih êkacakra warti. Tělas // o //
Tidak ada komentar:
Posting Komentar