SIRA SANE KASENGGUH NABE NISKALA KALAWAN NABE SEKALA

SIRA SANE KASENGGUH NABE NISKALA KALAWAN NABE SEKALA 

Katedun olih: Tubaba

Apa ané tegehan tekén langit? Nabe, kénten kocap pasaut Dharmawangsa. Makejang anaké matutang pasaut punika. Mawinan ngantos mangkin yén wénten patakon kadi punika, setata anaké maosang Nabe sané tegehan tekén langit.

Sira sané kesengguh Nabe punika?

“Tegehan tekén langit” alus ipun “luhuring langit”. Yén ring kekidungan Déwa Yadnya, Betara sané kawuwus tedun saking luhuring langit inggih punika Betara Siwa. Kocap kadi punika katatwan Ida, masthana luhuring langit, ring Shunyaloka, sané ten kapineh yén kapineh-pineh. Betara Siwa taler keparabin Purusa, utawi Mahapurusa. Ida sané kaucap Nabe?

Wénten Siwa sané saking gumi, inggih punika Sulinggih. Sulinggih kaucap Siwa sekala ri kala Ida mayoga masedana jangkep. Ida mangastawa mangastuti masadana mantra, japa mantra, bija-mantra, kuta-mantra. Siwa di guminé puniki sané kabaosang Nabe "Ida Sinuhun?"

Dumun yakti para wiku maosang ragan Idané Nabe ri kala mawarah-warah ring sisyané. Mangkinan sampun dangan sané nyebut Nabe. Ten kauningin napi awinan magentos. Minab puniki - minab punika.

Ring sesonténgan, Akasa kocap sané kasengguh Nabe Hyang Sinuhun. Ring wewilangan Panca Mahabhuta yakti Akasa punika sané kabaos pinih luhur. Langit punika wantah wates pengliatan. Asapunika dohné mata dadua puniki sida nyingakin, sawates langit.

Sujatiné kocap luhuran saking langit taler Akasa. Sangkanin wénten ucap “langit tupang pitu”. Saduuran punika kocap wénten malih. Mawinan para pangawi sastrané nyurat Akasa punika ten matepi. Ten neked-neked yén duluh aji papineh.

Menawi sané kabaos Nabe punika taler matingkat-tingkat. Ada Nabe sekala di gumi, ada Nabe niskala di langit éndép, ada masih Nabe di langit tegeh. Ngancan menék-menékang ngancan tegeh Ida sang maraga Nane, nganti sing nyidang nyujuh.

Nah,..... Nabe sané paek anggon gegisian. Wiréh yén sing magisian bisa srayang-sruyung pajalané. Cara megat titi cenik, yén sing melah ban magisian bisa labuh ka tukadé.

Nabe sané duur sirah anggon gantungan keneh. Yén keneh sing gantungan di tongos ané beneh, koné mirib cara layangan pegat, kema-mai ampehang angin. Dija kadén lakar ulung maglebug.

Nabe sané sawat sing kepineh buin, anggon sesuhunan. Wiréh yén sing koné masuhunan bisa goloh sirahé, yén ada angin baret mirib ampehang angin.

Yén manut buku papelajahan agamané di sekolahan, koné ada Nabe sané ngranayang i raga lekad uli di basang Mémé. Anaké mangkin maosang nika mawasta Bapa “biologis”. Nabe kadi punika sané kabaos Nabe sané paek.

Wénten taler Nabe sané ngranayang i raga lekad uli di basang sastra utawi Tattwa-Jnana. Anaké mangkinang maosang punika Nabe ring dharma. Nabe kadi punika genahné duur sirah, tongos ngantungan keneh.

#tubaba@griyang bang//mineh2ang sasunduk//kadi aab jagat#