Babad Sulinggih Prama Daksa ManuabaMogi-mogi nenten keni upadrawa

SARGAH, I

Babad Sulinggih Prama Daksa Manuaba

Mogi-mogi nenten keni upadrawa

A.    Puniki ngaran Babad Sulinggih Prama Daksa Manuaba.

Asapuniki slokannya : 

Ong diwyem dhatra buddhaya namaskranem,

Twem nugrahem samahitem,

Tar pragyem dhipate suddhastu niscalem

Sarwa karma sidhyate.

Ongkarem candra siwastra waranem,

Kresna turtyyasca wicakyem

Sonitem buja murdha sujitem artthanem,

Satya satyem sahasranem

Wyantrem windu dwaya jiwitem mahalokem,

Tas patyem citrsodhitem,

Karttawyem brahmasargah niccatem,

Langganiem pindha sudhyate.

Ewarcanem sarwwajna wiryem

Sangkhyamnasca widhyate

Beda namotrasyem niccayem

Cakliyacca wratmannamasciwaya.

Apiccha : 

Sembah pangubaktin titiang ring buk padan Ida Bhatara Sinuhun Parama Daksa pingkalih Ida Bhatara Sinuhun Siwa Putra Parama Daksa Manuaba sane meraga putusing kebrahmanan, santukan sangkaning asung Idane micayang kajagadhitan ring titiang, dumogi titiang prasida muputang tur mikolihang sakancan sane kardinin titiang tur tan keni wighna upadrawa, titiang mamanah nyobiahang parindikan carita, nyaritayang indik pangawiting keturunan Sulinggih Kapurusan Prama Daksa Manuaba, ring Griya Agung Bangkasa, Banjar Pengembungan, Desa Bongkasa, Kecamatan Abiansemal, Kabupaten Badung - Bali. Titiang mamanah jagi nyaritayang “Purwa Tatwa Wangsa Parama Daksa Manuaba”. Sane aturang titiang sane mawit sakeng “ Ongkara Candra Siwa Rastra Yana” patemoning Kresnadnyana Catur Masa Dasa Ya, Swanitaning Buja Murdha Asuji Ta Ya, Isakania “Sahassra Murdha Wlungatus Selae =1825”, punika pawilangan tahun ipun duke pemargin Ki Dalang Tangsub putra kebrahmanan dari Ida Pedanda Sakti Manuaba (Ida Brahmana Nyoman Buruan) maring Griya Sakti Manuaba Kendran, puniki dewasa mrekreti Wangsa Prama Daksa Manuaba pinaka pangawiting wangsa, nawegang titiang ring sang parama ledang ngawacen tur mirengang.

Kawitin titiang, maka pangawit wantah Ida Bhatara Sinuhun Parama Daksa pinaka warih Brahmana Manuaba, katurunan Ki Yai I Gusti Agung Pasek Gelgel Aan Manuaba Bangkasa, Paratisentana Ki Yai I Gusti Agung Jro Ketut Dalang Tangsub, rauhing panrestin idane ring jagate, punika sane pacang aturang titiang, malarapan antuk sloka wakya sakadi puniki : 

Tito sunia mahalokem, na cha dewa atamasca,

Ta mayogem nasyatanca, sitayogem marasdewi,

Na cha brahma sayogasca.

Apiccha : 

Atur uningayang titiang, Sila Purananing Ki Yai I Gusti Agung Pasek Gelgel Aan Manuaba Bangkasa Warih Brahmana Jati, pratisentanan Ki  Yai I Gusti Agung Pasek Gelgel maring desa Aan, katurunan Kyai I Gusti Agung Pasek Gelgel Maring jagat Swecapura.

Purwaning tattwa, duk pamadegan I Gusti Agung Maruti, maring panagara Swecapura Gelgel, makadi Patih Agung, sira ping arep wenang kawenangan dadi kawuwus, maka prakanggo panuhaning maring Gelgel, wantah Ki Gusti Pasek Gelgel, katereh dena Kyai I Gusti Agung Pasek Gelgel ing kuna. Trepti landuh ikang jagat Swecapura, kertha raharja gemah ripah loh jinawi ikang jagat, pandung, leyak, sakancaning “Asura”, “Gandharwa”, Butha, Kala, Yaksa, Pisaccha, Raksasa, Naga, Paksi, Triak, sarwa paneluhan tatan hana wani, teka rep sirep. Ika marmanya para patih mwang mantri ngarasa kaciwa dening kaprajnan mwang kawicaksanan lan kawidagdeng Ki  Gusti Pasek Gelgel, laju sira maha mantri Ki Dukut Kerta ngareka upaya, maka sida kasor Ki Gusti Pasek Gelgel. Nging tan kasidan, apan Ki Gusti Pasek Gelgel mwang sasanak ira, weruh sira ring sistangkara upa sandhi, tatwa dyatmikaning sariran ira, weruh sira ring solah sipta maya, sakadi panangkaning baya. Marmanya Ki Gusti Pasek Gelgel mwang sanak ira, aninggal Swecapura, anyilib duk We, So, U, wara Tolu, sasih Mukha nemoning Tilem.

Titanen mangke Ki Gusti Pasek Gelgel sasanak ira, sakeng jagat Swecapura lumampah jumujug Ersanya, maring telenging awan, tininggal den ira bukit, tan kawarna maring awan wus prapta sira maring bukit inucap, ingaran bukit buluh maring jagat Gunaksa. sakeng ngkana maring Bhayangwya, tininggal dening Ki Gusti Pasek Gelgel, hana taru wandira kembar ageng mwang aluhur, kapikayun den ira genah ika mautama saha madurggama. Wetning samangkana laju lumaris Ki Gusti Pasek Gelgel, kapareng sasanak ira makabehan, jumujug Bhayangwya, tan titanen maring awan, prapta pwa sira maring wana agung, kapanggih akeh taru agung. Rob rwanya, apanjang bangsingnya, akahnya pasrembyah makakilit, kagawong sing ngatonang, res citan ira Ki Gusti Pasek Gelgel, kapareng sasanak ira. Wana inucap jimbar lan apanjang, ingkana Ki Gusti Pasek Gelgel, pareng sasanak ira asandekan, kaswen genah ika lwih ngalangunin hyun ira, laju wana inucap kinarabas de Ki Gusti Pasek Gelgel, wus puput laju ingaranan desa Akah, mangkana katattwanya hanane desa Akah rawuh mangke.

Pira swen ira Ki Gusti Pasek Gelgel agenah maring desa Akah, laju sira angalih genah, anuju maring Bhayangwya, aninggal aken anten ira maring desa Akah sawiji, kawekas kawuwus I Gusti Pasek Gelgel Akah. Tan kawarna maring awan, Ki Gusti Pasek Gelgel kapareng sasanak ira, prapta maring wana andong, ijo warnanya, ajajar genahnya. Wana inucap apanjang tur genahnya angandang, laju wana ika kinarabas denira, riwus puput, ingkana Ki Gusti Pasek Gelgel ngawangun desa, ingaranan desa Mahandwang, apan wana inucap genahnya ngandang, wekas kawuwus desa Mandwang. Alawas-lawas Ki Gusti Pasek Gelgel, malih agingsir angalih genah, tininggal denira desa Mandwang, saha aninggal anten ira satunggal, kang kawuwus I Gusti Pasek Gelgel Mandwang. Sakeng desa Mandwang sira lumampah anuju Bhayangwya, maring awan papangguh lalungguhan marupa watu ireng, nging sira ndatan araryyan, lumampah pwa jumujug Bhayangwya.

Tan kawarna lampah ira Ki Gusti Pasek Gelgel, kapareng dening sasanak ira, tan pajumuga wus prapta sira maring wana agung, laju wana inucap karabas. Sakeng ngkana lumaris sira Ki Gusti Pasek Gelgel Mangutara, kapanggih bukit-bukit, tembenya Ki Gusti Pasek Gelgel, awali mareng Agneya kapangguh pwa bukit malih, ingaranan bukit Kembar. Ingkana Ki Gusti Pasek Gelgel angarabas tataronan, angawit ngamurwa, raris mangidul, trus kamadya, ngalantur mangalor mwang mangulwan. Solah ira duk ngarabas tataron inucap, kawuwus selasah-seleseh mwang selasah-selisih. Ingkana Ki Gusti Pasek Gelgel kapareng sasanak ira asandekan, laju angawangun linggih, tembenya genah ika ingaranan desa Selesehan, desa Selisihan ngaranya waneh. Sakeng desa Selesehan Ki Gusti Pasek Gelgel kapareng sasanak ira malih agingsir genah jumujug Kulon, munggah maring bukit Uluran, sakeng ngkana sira amawas, genah kang kawuwus mauttama, wekas an bukit ika ingaranan bukit Pangukur-ukuran, kapi kahyun de Ki Gusti Pasek Gelgel apan wara nugraha Bhatara sami, utamanya Bhatara maring Catur Parhyangan.

Cinarita Ki Gusti Pasek Gelgel mwang pasanakan ira, saking puncak bukit Pangukur-ukuran, tumurun laju lumaris jumujug mangidul, kang tinuju ndatan waneh genah wit wandira agung kembar inucap. Saprapta ira ingkana, kapangguh genah inucap wana agung, akweh wit haa agung-agung aluhur, irika Ki Gusti Pasek Gelgel, anuhur asung kertha wara nugraha Hyang Widhi Wasa mwang Bhatara maring Catur Parhyangan. Kapi kahyun wus molihang wara nugraha, laju Ki Gusti Pasek Gelgel kapareng pasanakan ira, saking ersanya ngawit angarabas wit haa kang agung-agung aluhur inucap. Tan kawarna, wus rwa pah tiga wana inucap sidha karabas, mwang kari apah tiga maring kidul, araryyan pwa Ki Gusti Pasek Gelgel angarabas. Tembenya ring dina, So, Wa, wara Medangsya, malih pwa sira ngawit angarabas wana mwang taru haa inucap, laju ingkana pwa sira angawangun pasraman, heneng akena kata sekareng.

Tucap mangke, ring rahina, Ra, Wa, wara Kerulut, kapangguh wong pawestri asemu ireng manis, rambutnya ambotan belayag, rawuh saking lor, angawa panarak buri mwang bungbung apuh. Wus prapta maring lungguh Ki Gusti Pasek Gelgel , tinanya wong pawestri ika olih Ki Gusti Pasek Gelgel, alon manis ling ira, "singgih pangampura hulun wong pawestri, saking ndi paran mwang siapa dasa nama nira?". Sumahur wong pawestri inucap, "ndaweg hulun, hulun sakeng desa Tista, aran hulun Ni Luh Putu Giri, hulun amurang-murang lampah, tan patatujon". Tambenya Ni Luh Putu Giri, kalap rabi dening Ki Gusti Pasek Gelgel, laju sang rwa amuputaken angerabas wana mwang wit haa inucap, ingkana ta sira wekasan alungguh alaki rabi, kapareng dening sasanak ira.

Titanen mangke, duk dina, So, Wa, wara Medangsia, sasih Whaisaka, tang, ping, 1, ngawit pwa sira angawangun Pura Parhyangan, ingaranan Pura Pasek. Ring dina, A, Ka, wara Perangbakat, tang, 1, sasih asadha, macan mara cika, arryang labha, pati pepet, indra tulus, ngawangun pwa sira Pura Dalem Kidul. Tembenya duk dina, Whra, U, wara Dungulan, sasih Caitra, ngunya Whaisaka, wurukung sri, duka, pepet, sri dadi, rah, 0, sira ngawangun Pura Desa Bale Agung. Wekasan maring genah wit wandira kembar inucap, duk dina, Whra, U, wara dungulan wara Tolu, purnamaning sasih kartika, malih Ki Gusti Pasek Gelgel ngawangun Pura Ibu Agung. Tambenya ring dina, Bu, Wa, Kelawu, sasih Kartika, ngunya Whaisaka, sadana yoga, mretha yogha sari, tutur mandi, duk ika Ki Gusti Pasek Gelgel ngawangun Marajan Kamulan Taksu. Alawas lawas sawengkweng waha haa inucap, ingaran jagat Aan, mwang ngawit ika Ki Gusti Pasek Gelgel, kawuwus I Gusti Pasek Gelgel Aan.

Tan kawarna pira swenya, I Gusti Pasek Gelgel Aan haneng desa Aan, anten ira laju agingsir lungguh, lwirnya, hana anuju desa Sangkanbhuwana, wekasan kawuwus I Gusti Pasek Gelgel Sangkanbhuwana. Hana pwa agingsir maring Budaga, kang kawuwus I Gusti Pasek Gelgel Budaga, mwang hana awalya maring Gelgel, wekasan kajuluk I Gusti Pasek Gelgel. Alawas-lawas I Gusti Pasek Gelgel Aan pareng stri nira Ni Luh Putu Giri haneng desa Aan, laju angewetuaken tmaja jalu sapta kwehnya, lwirnya, kang panuha apanelaha I Wayan Gde Pasek Aan. Kang pamade apanengeran I Made Gde Katrangan, kang satri ingaran I Komang Gde Teguh Timbul, kang catur anama I Ketut Gde Tuwung Kuning, kang panca apuspita I Wayan Putu Pasek Kerani, kang sad apenelah I Gde Pasek Batu Melumut, kang sapta apenengeran I Gde Pasek Sumerta. 

Tan titanen mangke kawuwus kunang putran I Gusti Pasek Gelgel Aan kang panuha, nga, I Wayan Gde Pasek Aan, abhiseka Ki Gde Pasek Aan, angalap rabi anama Ni Luh Gde Mawi, adrewe putra kakung rwang diri, kang panuha apanelah Ki Gde Pasek Tarunatwa, anten ira apuspita Ki Gde Pasek Aan. Ki Gde Pasek Terunatwa ngawangun tatamanan, maring kiduling desa Aan, kalangkung asri tatamanan inucap, hana pancoran limang kecoran, mwang sarwa puspa harum sumirit, ika marmanya dadari Dyah Maya tumedun haneng kendran. Titanen Ki Gde Pasek Terunatwa, kadawut hyun ira angatonan dadari ika, laju kalap rabi Dyah Maya dening Ki Gde Pasek Terunatwa, heneng akena kata sakareng.

Walyan ikang kata, cinarita anten ira Ki Made Gde Pasek Aan, wus angalap rabi, anama Ni Gusti Ayu Nyoman Rai, sira agenah maring kadatwan Aan, kawuwus jro wayah. Tembenya asutha pwa sira rwang diri jalu stri, kang panuha apanengeran Ki Gde Pasek Aan, muwang anten ira stri, anama Ni Luh Made Rai Sukarni, henengakna kata. 

Tucapa mangke, Ki Gde Pasek Tewrunatwa, wus aputra sad diri kwehnya, lwirnya, kang panuha Ki Gde Pasek Bungbungan, amaceki maring desa Bale Agung, pradesa Bungbungan. Kang pangulu apanelah Ki Pasek Pau, amaceki maring banjar Pau, desa Tiyingan, agenah wetaning wantilan, nyentanayang Ki Gde Jegug. Kang katrini Ki Pasek Sangkanbhuwana, kang catur Ki Pasek Akah, kang panca ingaranan Ki Pasek Mandwang, mwang kang wuruju apuspita Ki Pasek Budaga.

Kunang kawuwus Ki Gde Pasek Bungbungan, apan bungbung apuh inucap, kangge amejahaken sarwa satru ing kuna. Wekasan Ki Gde Pasek Bungbungan angalap rabi anama Ni Gusti Rai Latri, atmaja tigang diri, lwirnya, kang panuha I Gede Pasek Bhawa, abhiseka Ki Agung Pasek Bhawa, kang madya Ki Agung Pasek Apuan, agenah maring banjar Apuang, desa Singapadu, kang wungsu Ki Agung Pasek Jehem, amaceki maring banjar Kelod desa Jehem, jagat Bangli. 

Titanen Ki Agung Pasek Bhawa, amaceki maring desa Gunung, iniring de wadwan ira petang dasa dua diri, ingkana sira Ki Agung Pasek Bhawa arabi maring Ni putu Sandhi sakeng desa Gunung. Wekasan pradesa Gunung giningsir aken maring kulwan, ingaranan desa Gunungaba, alawas-lawas ngaran desa Manuaba.

Duke riin warsa siyu wulungatus selae masehi ring desa Manuaba, wenten Ida Brahmana sakti sane mapesengan “Ida Brahmana Nyoman Buruan kawuwus Ida Bhatara Sakti waneh”, Ida wantah pangawit jagate ring “Desa Manuaba” trepti tatan kirang sandang pangan, lan sawewengkon genah inucap gemah ripah loh jinawi, wit idane kairing dena I Ketut Tangsub, putran Ki Agung Pasek Bhawa. Duwaning dane I Ketut Tangsub teleb ring sadaging sastra mautama turmaning uning ring sakancaning siptakara, ingkana sangkaning yogan “Ida Bhatara Sakti”, maring pasraman Idane mapwara I Ketut Tangsub kaembasang dados putra Jnana mautama luwih,  samaliha pamijilin idane nenten keni “tua pati”. Puniki aturang titiang pangawit Yogan Ida Bhatara Sakti, sapuniki indike.

Ri wus I Ketut Tangsub dwijati den sira Bhatara Sakti laju abiseka sira Ki Yai Jro Ketut Dalang Tangsub, sangkanin kaprajnanan dane maring silakramaning angelaraken darma pawayangan, tuhu maring pasukwetuning sarining kanda pat ring sajroning budindria. Ri kanjekan Ki Yai Jro Ketut Dalang Tangsub angelaraken tapa brata yoga samadhi sareng Ida Bhatara Sakti maring pasraman Griya Sakti Manuaba. Sang kalih nguncarang japa mantra ngastawa Ida Sang Hyang Cittadewa, kagiat katon Ida Sang Hyang Naradewa. Anunggalaken Ida Sang Hyang Tunggal maring bayu, sabda idep raris mijil Sang Hyang Ratnamaya. Ngastawa Ida Sang Hyang Ratnamaya raris mijil Sang Hyang Brahma punika makasami raris nunggal ngelarang yoga, mangdane werdi jagate tur rahayu. Sesampune jagate puniki jangkep antuk sarwa pranine, punika te mahawinan jagat kendran trepti. Yening kudang warsa punika jagate landuh trepti, sane mangkin magantos alikan jagate manados “Sangharakalpa” sapuniki slokanipun : 

Sangharatem mahalokem,

Rudran ca ghni basmityem,

Cunya ta ya andakarem,

Eka bhuanas ca dhistitah.

Apiccha : 

Sesampune trepti jagate, mangkin raris Kali Sanghara, sane kakardinin antuk Sang Hyang Agni Rudra, kageseng jagat tigane karubeda antuk Butha, tan dugi suung mangmung anrawang, peteng dedet punika jagate sami. I rika raris Sang Hyang Eka Bhuana nitah Sang Hyang Brahma (Catur Muka), mangdane ida ngurip ngutpeti malih sadaging jagate sami, mangda mawali malih sakadi sane kuna, raris malih punika jagate sakadi taluh sane kaurip antuk Bhatara Brahma, pingkalihne Ida nyentokang kapradnyannan idane, ida ida ngawentenang malih daging jagate sami, ida sane ngurip malih jagat miwah segarane, gunung, santukan duke punika jagate sakadi Moksa tan wenten Prabawane. Duk punika kawastanin “Param Brahma” nenten wenten sios. Ri kala punika Ida Bhatara Brahma masabhawa “Sang Hyang Antakala Rudra” wastannyane. Ida mikayunin jagi ngurip jagate, ngawit i rika raris Ida maparab “Bhatara Brahma”.

Di gelis Bhatara Brahma ngwangun Yoga, sangkan pangwesan kawiadnyanan idane, raris sakeng yogan idane punika medal “Asura”, “Gandharwa”, Butha, Kala, Yaksa, Pisaccha, Raksasa, Naga, Paksi, Triak. Durung taler jangkep panrestian idane, malih Ida Bhatara Brahma mayoga, larapan antuk yogane punika raris embas “Resi” kekalih, mungguing Resine punika maparab “Sang Ndanama” lan “Sang Hyang Sanat Kuamara”, makakalih tan bina sekadi Bhatara Brahma, pateh-pateh kapradnyanan idane, tur pateh-pateh buat kasaktian idane.

Taler durung jangkep kapikayunan antuk Bhatara Brahma daging jagate, ne mangkin malih Ida ngelarang Yoga, raris wenten cihna medal sakeng “Siwadwaran” Bhatara Brahma, inggih punika “Sang Dewarsi”, sangha punika akehnyane, mangkin medal, pramangkin Anom, makasangha putusing adnyana, “Resi Sidhawakya” punika ida, mungguing pesengan idane, makadi: “Bhagawan Marici, Bhagawan Brgu, Bhagawan Anggira, Bhagawan Pulastia, Bhagawan Pulaha, Bhagawan Ketu, Bhagawan Atri, Bhagawan Wasista, Bhagawan Dhaksa, sira Dewarsi pada wagmimaya ida.

Malih Ida Bhatara Catur Muka nglarang yoga, sane kaastawa Ida Sang Hyang Parameswara, duk punika Bhatara Brahma apapasih Bhatara Pita Maha. Sampun katah pisan pasuecan Ida Bhatara Brahma ngutpeti sadaging Tri Bhuanane, taler durung jangkep daging jagate, punika mawinan malih Ida mayoga, tumus turmaning sidaning sidi yogan idane, raris wenten medal andus macampur geni, medal sakeng kasidiadnyanan idane, sane katibayang ring Kundi manik sajroning adnyana, maprabhawa “Ongkara Amerta”,  sane dados Amertha, malih kayogayang antuk Ida Bhatara Brahma, raris prasida medal anak alit lanang asiki, mangkin mijil, pra mangkin taler Anom, samaliha Putusing Adnyana Ida, Ida mapuspata “Sang Hyang Dwijendra” miwah “Sang Mpu Rajakertha” pepasih idane. Ida ngembasang rare kakalih, sane maparab “Bubuksah miwah Gagak Aking”, sane ngawerdiang Siwa Budha, sane katurunane wenten ring Bhumi Keling, Ida pinaka Guru Loka i rika.

Kapikayunan durung jangkep daging jagate antuk Ida Bhatara Brahma, malih Ida Sang Hyang Braham mayoga, rep kasidiadnyananing yogan idane, tan pariwangde metu “Sang Hyang Mahadewa” saking tungtunging sari-sarining suksma, Intisari sakeng adnyana, buat kawisesan Ida Bhatara Brahma, mangkin embas, pramangkin anom, Suda Jnana Sidha Wakya Ida Bhatara, Brahma Sama Guna, pateh kawisesan Ida ring Bhatara, Ida ngawerdiang Brahmana Jina Kula (keturunan Budha) ring Medang Brata Warsa, sane ngwerdiang Brahma Kula.

Rep Mayoga Dang Hyang Mahadewa, sidhining Yogan Ida, tan dugi metu andus sakeng tungtunging adnyanan Ida, mangdados Bayu, Kama, runtuh ring ajeng Ida Bhatara Mayoga, raris kapratista Bayu Kamane punika, raris eling tur maurip matemahan anak alit, mangkin embas pramangkin anom, punika raris Ida maparab Dang Hyang Bajra Satwa, santukan Ida embas saking tungtunging Bajradnyanan Dang Hyang Mahadewa. Nenten wenten sane nyamenin indik Kamahatmian idane ring jagate, pateh sakadi kawisesan Bhatara Mahadewa, kasub kasumbung kawisesan muang kapradnyanan idane ring jagate, pateh ring Dang Hyang Mahadewa luihing guna muang kasaktian Ida. Kocap, Ida Dang Hyang Bajra Satwa, kapangandikayang ngelarang Yoga antuk Bhatara Mahadewa, raris ngawerdiang turunan Jina Kula ring Jawi Dwipa. Malih Ida ngelarang Yoga, rep tur tumus Yogan Ida, medal saking adnyana suksman Ida, saking Tanun Idane makebyor, kadi Pahesan, raris punika sane yogaang Ida antuk Yoga maya, wastu matemahan anak alit, mangkin embas pramangkin anom, raris kapapasihang Dang Hyang Tanuhun, nenten wenten sane nyamenin indik KA-Asteswaryan idane, pateh sakadi kautamaning Dang Hyang Sri Bajrasatwa, prabhawa miwah kasaktian.

Ida Dang Hyang Tanuhun, katitah antuk Dang Hyang Bajrasatwa mangda mayoga, mangda prasida ngawerdiang kulawangsan idane ring Jawi Dwipa. Raris Ida Dang Hyang Tanuhun Mayoga, rep wiakti kasidhi adnyanan yogan idane, raris medal Bayu macampuh Api, medal sakeng sandining Yogan Ida, dados Andus matemah Amerta, punika sane kaurip raris medal anak alit “Rare” mangkin embas pramangkin Anom, Ida Warah Tan Winadan, punika mawinan Ida maparab Dang Hyang Mpu Pradah, kasub kasumbung kasidiadnyanan idane ring Bumi Bratawarsa, sama rupa (pateh prabhawan Ida) sareng ring Dang Hyang Tanuhun indik Guna miwah kasaktian idane. Ida sampun kawaranugrahin antuk Ida Bhatara, mangda Ida Mratista pinaka Usadi ring Tri Bhuana ring Medang Bharata Wangsa. Ida raris katitah mangda Ida Mpu Pradah ngelarang Yoga antuk Dang Hyang Tanuhun, mangda Mpu Pradah ngawerdiang Santana ring Jawi Dwipa.

Raris mayoga Ida Dang Hyang Mpu Pradah, medal anak alit saking Bahula yogan idane, mangkin embas mangkin Anom, Bahula mateges Luih. Wiakti wantah luih pisan pawijilan idane, sakeng kautaman yoga sandhi, miwah sandhining Jnana Ida, raris mapesengan Dang Hyang Bahula, buat kawisesan, kautamaan miwah kapradnyanan pateh kadi Ida Dang Hyang Mpu Pradah. Mpu Pradah raris nitah Mpu Bahula ngelarang yoga samadhi, mangda Ida ngawerdiang Kula Wangsan idane ring Medang Brata Warsa. Raris Dang Hyang Bahula ngelarang Yoga, wisayan yogan Idane wiakti rep, siddhining Yoga, tan dugi raris medal anak alit, medal sakeng Sunianing Jnana yoga sane kamargiang, mangkin mijil pramangkin Anom, putusing Sarwajnana, Tantularen kautamaning kapanditan Idane, Warmimaya Ida, punika mawinan Ida maparab Dang Hyang Tan Tular, santukan nenten wenten jadma sane mresidayang niru kautaman Idane, pateh sekadi Dang Hyang Bahula, kawigunan miwah kasaktian Idane. Tan prasida kasaihang indik Kaasteswaryan idane ring jagate, Guna Kara ida, Dewaning Jagate asih ring Ida, Dang Hyang Angsokanatha papasih ida tan wenten sios.

Ida Dang Hyang Tan Tular katitah antuk Ida Dang Hyang Bahula mangda ngawerdiang kulagotran idane ring Yawa Dwipa, raris Ida Dang Hyang Tan Tular mayoga, rep siddhining yogan idane, raris medal punika Maya Catur Warna, sakeng tungtunging Suniadnyanan Ida, mapupul makapapat dados tunggal, raris kayogain punika Catur Maya, ne punika, kapujain antuk Catur Puja, Siwastawa, Brahmastawa, Smarastawa, Wisnwastawa, pawaking Yoga Sang Hyang Kama Dresti. Raris maurip Catur Mayane punika, raris matemahan anak alit petang diri, maka patpat Lanang, mangkin embas, mangkin Anom, maka patpat punika putusing sarwajnana, pada Wagmimaya, pateh sakadi Dang Hyang Tantular, indik Guna miwah kasaktian idane. Raris sane pinih duur mapanengeran Dang Hyang Panawasikan, samaliha sane pinaka pangulum papasih Dang Hyang Sidhi Mantra, sane pamuruju mapatenger Dang Hyang Asmaranatha, tur sane pamungsu utawi pinih alit maparab Dang Hyang Kapakisan, santukan Ida sangkaning maya kinampiling pakis duke riin.

Ida Dang Hyang Panawasikan pateh sakadi Sang Hyang Jagatpati prabhawane. Ida dang Siddhimantra, Brahma Ida, pateh Prabhawa mwang kaasteswaryan idane. Ida Dang Hyang Asmaranatha tan bina sakadi Sang Hyang Manobhawa Kamahatmyaning kasteswaran Idane. Ida Dang Hyang Kapakisan wantah pangawataran Bhatara Wisnu kamahatmyaning keswaryan Ida. Ida Sang Catur Wija punika kapituduh antuk Dang Hyang Asokanatha ngawerdiang kula gotran Idane ring jagat Jawi Dwipa, rauhing ka jagat BALI, rauh kawekas-wekas .

Ri wekasan makadi Ida Dang Hyang Panawasikan wenten wijan Idane Sanunggul Istri, kalintang pradnyan luih listuayu, tan bina kadi Dewi Saraswati Subrati Ida.

Punika Ida Dang Hyang Siddhimantra, Ida madrue Putra Lanang adiri maparab IDA MANIK Angkeran, Ida ngulati wangsa Ksatria, Ida nurunang Arya Bang.

Malih Ida Dang Hyang Asmaranatha, Ida maputra lanang kakalih, sane pinih duur mapesengan Dang Hyang Angsoka, mungguing Ida i ari maparab Dang Hyang Nirartha utawi Dang Hyang Dwi Jendra pasadnyan Ida nenten wenten sios. Mungguing prabhawa, kapradnyanan lan kawicaksanan Ida Dang Hyang Dwi Jendra dahat kasteswarya, Ida lintang kaloktah tur kasumbung ring jagate.