MALA MIWAH SUDHAMALA (MALA SAJERONING ANGGA SARIRA

MALA MIWAH SUDHAMALA 

(MALA SAJERONING ANGGA SARIRA PRASIDA KASUDHAMALA DENING BAYUH TAMPEL BOLONG) 

#Tanggal 7 April 2020//Griya Agung Bangkasa

Akéh kocap ketekan mala ring sarira; 

1. Wénten dasa-mala sané mapaiketan sareng 

    dasa-indriya. 

2. Wénten mala pelekadan saking bapa ibu, 

    sané kawastanin mala ning bapebu. 

3. Wénten maléndriya, inggih punika mala 

    saking pamurtian ning panca indriya. 

4. Wénten sané kabaos trimala, inggih punika 

    mala ning bayu, mala ning sabda, mala ring 

    idep. 

5. Taler wénten malih soroh mala sangkaning 

    salah-masa, upaminipun embas ring 

    Tumpek Wayang. 

6. Mala sangkaning salah-genah, upaminipun 

    nguncaran wéda mantra pingit sambilan 

    majalan-jalan di Mall.

Akéh malih wénten kadang-wargan malané. Yén samian soroh mala punika mamurti, angga sariran manusané punika kocap pateh sekadi sebun mala. Daging pepineh, wacana, lan parilaksana, ten lian wantah mala. Saking mala medal mala mawali mala. Sekadi gunung luhu malané matumpuk-tumpuk. Ngranayang jagat bhuwana ten urung kamalaan.

#Mala ring sarira kabaos mala ning awak 

#Mala ring bhuwana kabaos mala ning jagat. 

Makakalih pada surup-sumurup. Saling celepin. Makilit-kilit kadi pasanggaman ula. Sangkaning akéh wénten mala ring awak, jagaté dados letuh-leteh. Ulian mala di jagaté matumpuk-tumpuk, awaké sing suud-suud dadi cara sebun mala.

Mawinan unteng Bayuh Tampel Bolong boya lian ngutang mala, nganyut mala, ngaruwat mala, ngeseng mala, nambakin mala, marisuddha jagat, marisuddha awak.

Yén malané sampun kasudhamala; kakutang, kaanyud, kageseng, karuwat, kocap manusané mawali nir-mala. Nir-mala punika kawastanin suddha. Sané suddha punika niscaya siddhi. Sané siddhi punika siddha saddhya. Rikala manusané sampun mawali suddha nirmala, niscaya jagaté taler nir-mala.

Santukan akéh kadangwargan malané, akéh taler sarana pamarisuddhané. Manut ring tattwané, wénten sarana toya (tirtha). Wénten sarana api (tapa yoga). Wénten sarana toya tan patoya (shastra). Wénten sarana api tan pakukus (agni rahasya). Yén manut ring susilané, dasa-mala punika karuwat olih dasa-sila, inggih punika panca yama brata lan panca niyama brata. Yén ring upacarané, saranané marupa banten bayuh tampel bolong miwah sasolahan. Wénten sasolahan wayang Suddhamala, wayang Sapu Leger, sesolahan Calonarang, miwah selantur ipun.

Samian punika wantah sadhana utawi sarana. Yasdyastun akéh maduwe sarana, ten suddha awak miwah jagaté saking mala yén ten tepet.

Napi sané mawasta tepet? Indik tepeté puniki sané patut kepineh-pinehin olih kramané sané ramé-ramé mligbagang indik suddhamala ri kalaning Pésta

#tubaba//griyang bang#

#bayuh tampel bolong//7 april 2020#

#kontak//081353057625#